Ndërlidhjet

logo-print

ANEB vazhdon vizitën në Iran


Reaktor bërthamor në Iran.

Reaktor bërthamor në Iran.

Inspektorët bërthamorë të Kombeve të Bashkuara janë duke vazhduar vizitën në Iran, pas shqetësimeve në rritje mbi aktivitetin e tij atomik.

Kjo është vizita e dytë në më pak se një muaj e inspektorëve të Agjencisë Ndërkombëtare për Energji Bërthamore (ANEB), të cilët shpresojnë të takojnë shkencëtarët atomikë të Iranit dhe të vizitojnë kompleksin ushtarak Parçin.

Ky i fundit dyshohet se strehon një strukturë sekrete bërthamore, që përdoret për programin atomik të Iranit – pretendime që hidhen poshtë nga Republika Islamike.

Inspektorët e ANEB-it kanë vizituar Parçinin në vitin 2005, por jo të gjitha zonat me interes brenda kompleksit.

Vizita e ANEB-it vjen pak ditë pasi Irani ka bërë publike ato që i quan "avancime në programin e tij nuklear".

Ajo vjen po ashtu në kohën kur Republika Islamike ka nisur stërvitjet për mbrojtje ajrore në jug të vendit.

Ndërkohë, Ministria iraniane e Naftës ka tërhequr vërejtjen se ndërprerja e eksportit të naftës për Francën dhe Britaninë, mund të zgjerohet edhe ndaj vendeve të tjera të Bashkimit Evropian.

BE-ja i ka hedhur poshtë kërcënimet.

Perëndimi druan se Irani ka për qëllim krijimin e armëve bërthamore, andaj edhe ka miratuar një sërë sanksionesh që godasin edhe industrinë e tij të naftës, edhe bankën qendrore.

Irani i mohon akuzat duke thënë se programi i tij bërthamor ka synime civile paqësore, e madje edhe trajtimin e kancerit.
XS
SM
MD
LG