Ndërlidhjet

logo-print

Thaçi: Kjo është formulë e përkohshme


Hashim Thaçi

Hashim Thaçi

Pas arritjes së marrëveshjes për bashkëpunimin rajonal ndërmjet Kosovës dhe Serbisë në Bruksel, kryeministri i Kosovës, Hashim Thaçi, ka mbajtur një konferencë të jashtëzakonshme për media.

Shefi i ekzekutivit kosovar marrëveshjen e ka cilësuar si jashtëzakonisht të rëndësishme për vendin dhe ka thënë se kjo marrëveshje i sjell Kosovës integrimin evropian.

Lirisht mund të them se përderisa marrëveshja e Rambujesë i solli Kosovës lirinë, e marrëveshja me Planin Ahtisari i solli pavarësinë, marrëveshja e sotme i sjell Kosovës integrimet evropiane dhe e bën Kosovën, Kosovë evropiane. Dhe, nuk po flas këtu vetëm për liberalizimin e vizave apo marrëveshjen tregtare, por për një proces të ri - procesin e stabilizimi-asociimit që është hapi i parë zyrtar në procesin e anëtarësimit të shtetit të Kosovës në familjen e madhe evropiane”, ka thënë Thaçi.


Kryeministri Thaçi ka pranuar se “formula në fusnotë nuk është ideale, por është më e pranueshmja për momentin politik, në të cilin po kalon Kosova”.

“Kjo është formulë e përkohshme. Unë jam shumë i vetëdijshëm që veprimi i Qeverisë nuk është shumë populist, por jam i bindur se është në të mirën e vendit”, është shprehur Thaçi.

Sipas tij, marrëveshja e arritur të premten në Bruksel, ka larguar përfundimisht UNMIK-un nga tavolina e përfaqësimit me Kosovën.

“Kosova, me këtë marrëveshje, u përcaktua për integrim dhe jo izolim. Kosova u përcaktua të përfaqësojë vetveten dhe jo të përfaqësohet nga të tjerët. Kosova ka qenë Republikë edhe dje, kur në këto forume rajonale është përfaqësuar nga UNMIK-u dhe me mbishkrimin 1244, dhe do të vazhdojë të jetë republike edhe sot, kur do të përfaqësohet nga Institucionet e Kosovës, pa UNMIK, dhe me fusnotë të balancuar me Opinionin e GJND-së për Deklaratën e 17 Shkurtit për Pavarësinë”, ka theksuar Thaçi.

Kreu i ekzekutivit është zotuar se do të punojë për integrimin sa më të shpejtë të Kosovës në NATO dhe në BE, duke thënë se një gjë e tillë është vizion i të gjithë qytetarëve të Kosovës.


Reagimet e opozitës

Pas arritjes së kësaj marrëveshjeje, kanë reaguar edhe partitë politike opozitare në vend. Lidhja Demokratike e Kosovës, përmes një komunikate për media, ka thënë se “Kosova duhet të përfaqësohet në të gjitha nismat rajonale si vend sovran, e i pavarur me emrin e vet kushtetues".

“Duke ritheksuar përkushtimin e vet të përhershëm për perspektivën e Republikës së Kosovës në BE dhe në strukturat euroatlantike, si dhe duke ritheksuar përkushtimin e thellë për miqësi të përhershme me SHBA-në, LDK-ja vlerëson se aspirata historike e popullit të Kosovës për integrime mund të arrihet vetëm duke i forcuar institucionet e pavarura të vendit, demokracinë dhe pavarësinë e vendit brenda dhe në raportet ndërkombëtare”, thuhet në komunikatën e LDK-së.

Arritjen e marrëveshjes ndërmjet Kosovës dhe Serbisë për fusnotën, me të cilën Kosova do të përfaqësohet në forumet dhe nismat rajonale, Lëvizja Vetëvendosje e ka cilësuar si tejet të dëmshme.

Sipas liderit të kësaj lëvizjeje, Albin Kurti, marrëveshja e së premtes i ka hequr vendit tonë nocionin Republikë, ndërkaq, që mospërfshirja e Deklaratës së Pavarësisë së Kosovës në fusnotë e bën të papranueshme atë për, siç ka thënë ai, institucionet e vendit dhe popullin e Kosovës.

Kurti ka theksuar se marrëveshja për fusnotën nuk ka të bëjë vetëm me përfaqësimin, por edhe me bashkëpunimin rajonal dhe si rrjedhojë, siç ka thënë ai, në këtë formë Republika e Kosovës privatizohet.

“Pra, Republika e Kosovës, kësisoj, privatizohet. Atë mund t’ia shfaqim vetes sonë, por jo edhe të tjerëve. Qëndrimi personal i kryeministrit aktual, pa diskutim të Qeverisë dhe pa vendim të Kuvendit të Republikës së Kosovës, u shndërrua në marrëveshje me Serbinë. Kjo është marrëveshje personale e kryeministrit, ndaj së cilës nuk duhet të obligohen institucionet e shtetit dhe shoqëria e populli ynë. Me këtë marrëveshje, katër vjet pas shpalljes së pavarësisë, Kosovës përsëri po i bëhet statusi i papërcaktuar. Përsëri, për Kosovën e paqartë, po legjitimohen dy palë, vetë Kosova, por edhe Serbia”, ka thënë Kurti.

Ndryshe, përfaqësuesit e Lëvizjes Vetëvendosje kanë deklaruar se ditën e hënë, më 27 shkurt, do ta organizojnë një demonstratë paqësore, siç e kanë quajtur ata, gjithë-popullore. Me këtë demonstratë ata kanë thënë se do ta bllokojnë për katër orë punën e Qeverisë së Kosovës, e cila, sipas tyre, po e pezullon shtetin dhe pavarësinë e Kosovës.

Ndërkaq, zyrtarët e lartë të Aleancës për Ardhmërinë e Kosovës, marrëveshjen e arritur ndërmjet Prishtinës dhe Beogradit në Bruksel, e kanë parë si marrëveshje në vazhdën e pajtimeve të arritura deri më tash mes dy vendeve, e që sipas tyre nuk po realizohen ashtu siç do të duhej.

Në një prononcim për Radion Evropa e Lirë, nënkryetari i kësaj partie, Ahmet Isufi, ka thënë se pozicioni i Kosovës dhe paraqitja e saj në bashkëpunimet rajonale duke u prezantuar edhe me Rezolutën 12 44, e kthen Kosovën në pozicionin në të cilin ka qenë dikur në kohën e UNMIK-ut.

“Kthimi i Rezolutës 12 44 është rikonfimimi i prezencës së UNMIK-ut dhe po ashtu pa Republikën e Kosovës që do të duhej të ishte formulim në marrëveshje, cenon të arriturat që kanë qenë deri më tani në Kosovë”, ka deklaruar Isufi.
  • 16x9 Image

    Arton Konushevci

    Arton Konushevci merret me gazetari që nga viti 2001. Në vitin 2007 ka filluar të punojë si korrespondent i Radios Evropa e Lirë. Jeton në Prishtinë, është i martuar dhe ka dy fëmijë.

Trego komentet

XS
SM
MD
LG