Ndërlidhjet

Ekzekutohen dy “sulmuesit bjellorusë”

  • RFE /RL

Vladislav Kovalyov, njëri nga të ekzekutuarit, prapa grilave...

Vladislav Kovalyov, njëri nga të ekzekutuarit, prapa grilave...

Dy personat e dënuar për sulmet me bomba në metronë e Minskut, janë ekzekutuar, me gjithë kundërshtimet e grupeve evropiane për të drejtat e njeriut.

Në një raport të shkurtër, agjencia shtetërore BeITA tha se Uladzislau Kavalou dhe Dmitri Kanavalu janë ekzekutuar.

Në nëntorin e vitit të kaluar, dy 26-vjeçarët, punonjës fabrike, janë dënuar me vdekje, pasi janë shpallur fajtorë për sulmet në stacionin nëntokësor të kryeqytetit bjellorus, të cilat kanë lënë të vrarë 15 njerëz.

Nëna e Kavalout, Libou, tha se ekzekutimi i djalit të saj ishte hakmarrje nga qeveria e presidentit Aleksander Lukashenko.

Lule dhe qirinj në shenjë proteste kundër dënimit me vdekje në Bjellorusi.

Lule dhe qirinj në shenjë proteste kundër dënimit me vdekje në Bjellorusi.

Aktivistja e të drejtave të njeriut, Ludmilla Griaznova, ka dënuar vendimin e autoriteteve, duke thënë se “ekzekutimi i të ashtuquajturve terroristë, fajësia e të cilëve mbetet e dyshuar, tregon se qeveria është duke fshehur gjurmët e krimit”.

Mediat thonë se njerëzit, të zemëruar me lajmin, kanë hedhur lule dhe kanë ndezur qirinj jashtë stacionit të metrosë në Minsk.

Duke iu referuar ekzekutimeve, Ronald Pofalla, shef i stafit të kancelares gjermane, Angela Merkel, ka thënë se “marrëdhëniet tashmë të përkeqësuara ndërmjet Bjellorusisë dhe Evropës do të vështirësohen edhe më tej”.

Markun Lloning, zyrtar për të drejtat e njeriut në Qeverinë gjermane, e ka quajtur Lukashenkon “diktator pa zemër”.

Në Bruksel, Maja Kocijançiq, zëdhënëse e shefes për politikë të Jashtme të BE-së, Kethrin Eshton, ka cituar këtë të fundit të ketë thënë se dy të dënuarit “nuk kanë kaluar në proces të drejtë dhe nuk u është lejuar të mbrojnë veten”.

Bashkimi Evropian, muajin e kaluar, ka ashpërsuar sanksionet ndaj Bjellorusisë për shkak të represionit politik.

Bjellorusia është i vetmi vend në Evropë që zbaton dënimin kapital.(v.t.)
XS
SM
MD
LG