Ndërlidhjet

logo-print

Mbrëmje e qetë në Mitrovicë


Vendi ku ka ndodhur sulmi që la të vdekur Selver Haradinajn, Mitrovicë, 08 prill, 2012

Vendi ku ka ndodhur sulmi që la të vdekur Selver Haradinajn, Mitrovicë, 08 prill, 2012

Zyrtarët e Policisë së Kosovës bëjnë të ditur se nata e mbrëmshme në veri të Mitrovicës ka qenë e qetë dhe nuk është raportuar ndonjë incident.

Zëdhënësi i policisë për rajonin e Mitrovicës, Besim Hoti tha për Radion Evropa e Lirë se aktualisht gjendja është e qetë.

“Nata ka qenë krejt e qetë. Nuk është regjistruar asgjë që ia vlen për ta përmendur”, tha Hoti.

Ai tha po ashtu se policia vazhdon të jetë e pranishme 24 orë në lagjen e "Tre Rrokaqiejve", dhe në lagjet e tjera ku ka banorë të komuniteteve të ndryshme.

Natën mes së shtunës dhe të dielës ka ndodhur një shpërthim në një banesë në afërsi të "Tre Rrokaqiejve", nga i cili ka mbetur i vdekur 38 vjeçari Selver Haradinaj, dhe janë plagosur 5 anëtarët e tij të familjes.

Autoritetet e drejtësisë e kanë cilësuar sulmin si akt terrorist.

Ende nuk është arrestuar asnjë i dyshuar në lidhje me këtë sulm.

Ndërsa një ditë më parë, një grup serbësh në veri të Mitrovicës nuk ka lejuar Policinë e Kosovës që të vendosin pikat statike në lagjen e “Tre Rrokaqiejve”.

Zëdhënësi i Policisë së Kosovës, për rajonin e Mitrovicës, Besim Hoti tha se rreth 200 serbë të cilët ishin tubuar në lagjen e banuar me popullatë etnikisht të përzier, kanë penguar vendosjen e shtëpizave të policisë si dhe kanë demoluar kontenjerin.
XS
SM
MD
LG