Ndërlidhjet

Kundërshtime rreth projektligjit për shëndetësi


Ilustrim
Ilustrim
Projektligji për shëndetësi është miratuar në Kuvendin e Kosovës disa javë më parë. Ai ka kaluar në Kuvend me 64 vota pro.

Zyrtarë në Ministrinë e Shëndetësisë thonë se miratimi i ligjit për shëndetësi është shumë premtues, dhe bazamenti më i mirë i reformës shëndetësore.

Projektligji për shëndetësi, i cili është hartuar nga ministri Agani me ekipet e tij, dhe që ka kaluar në Kuvend, është një prej projektligjeve që i përmbush nevojat më të mira për qytetarët e vendit, dhe ofron shërbime shëndetësore më të mira, si dhe ofron një përgjegjësi më të lartë për profesionistëve shëndetësorë, duke i decentralizuar ata nga vendimet arbitrare politike. Ka pasur mbështetje edhe nga faktorët ndërkombëtarë dhe ekspertët e brendshëm, në kuptimin financiar dhe profesional”, thotë Abdullah Klinaku, këshilltar i në Ministrinë e Shëndetësisë.

Por Federata e Sindikatave të Shëndetësisë së Kosovës nuk pajtohet se ky projektligj është i tillë.

Ata kanë kundërshtuar ashpër këtë draft-ligj.

Blerim Syla, kryetar i sindikatës pohon se barazia juridike në mes të sektorit publik dhe privat, e cila është shprehur me projektligjin për shëndetësinë, kundërshton krijimin e Shërbimit Kombëtar të Shëndetësisë.

Sipas tyre, ai çon në privatizimin e institucioneve shëndetësore, si dhe ndalesë të ushtrimit të profesionit të punëtorëve shëndetësorë në dy sektorë, që sipas tij është e papranueshme për Sindikatën e Shëndetësisë.

Pika e parë partneritetit publiko-privat, Kosova ende nuk është e përgatitur që të hyjë në një aventurë të tillë. Pastaj është Shërbimi Kombëtar i Shëndetësisë, i cili tenton të shndërrojë në ndërmarrje publike, që nesër edhe të privatizohet me këto dy ligje, normalisht që e kundërshtojmë, është neni 41 brenda konfliktit të interesit me argument. U mundova ta shpjegoj që për momentin nuk mund të realizohet, dhe e katërta është kujdesi parësor, që në këtë ligj është i ‘sakatosur’ dhe nuk parashihet se ku do ta gjejë veten”, thotë Syla.

Ndërkaq, Luan Jaha, nga radhët e Aleancës për Ardhmërinë e Kosovës, anëtar i Departamentit për Shëndetësi, pohon se ligji i cili është aprovuar në Kuvendin e Kosovës, nuk është projektligj i cili duhet përkrahet.

Sipas tij, versioni i projektligjit, i cili është sjellë në Kuvend, nuk është versioni për të cilin kanë diskutuar.

Ne kemi qenë pjesë aktive e gjithë kësaj procedure, dhe shprehim zhgënjimin tonë se versioni i ligjit që ka ardhur në Kuvend nuk është versioni që kemi dhënë aprovim të fuqishëm më herët. Jemi shumë të vetëdijshëm që Kosovës i duhet një ligj për shëndetësinë. Jemi angazhuar shumë sinqerisht që ky ligj të jetë i përbashkët i kosovarëve sepse shëndetësia është një segment e cila i tejkalon interesat e partive, por fatkeqësisht ligji që ka ardhur në Kuvend, nuk është ligj i cili duhet të përkrahet”, ka thënë ai.

Në anën tjetër, Abdullah Klinaku, deklaron se draft-ligji nuk ka pësuar ndryshime esenciale.

Ndryshime substanciale nuk ka pësuar në asnjë pjesë të tij. Sigurisht që evoluimet apo ndryshimet që kanë mundur të nënshtrohen kanë ardhur si rezultat i konsultimeve me faktorë të brendshëm dhe jashtëm. Është e rëndësishme dhe fakt që ky projektligj është ai që projekton reformën shëndetësore, dhe kjo për neve është shumë e rëndësishme”, shprehet Klinaku.

Sidoqoftë, vetë ministri i Shëndetësisë, Ferid Agani, ka deklaruar se me projektligjin e ri do të bëhen reforma të thella shëndetësore.

Ai ka theksuar se do të parandalohet konflikti i interesit në sistemin shëndetësor, ndërsa do të aplikohen masa të rrepta për keqpërdorimet farmaceutike në veçanti dhe referencat nga institucionet publike në ato private.
XS
SM
MD
LG