Ndërlidhjet

logo-print

Gjeorgji: Saakashvili akuzon, Ivanishvili mbrohet


Njerëzit presin në rreshta për të votuar në kryeqytetin Tbilisi

Njerëzit presin në rreshta për të votuar në kryeqytetin Tbilisi

Në Gjeorgji po vazhdojnë votimet në zgjedhjet presidenciale, të cilat pritet se do ta përcaktojnë kursin politik të këtë vendi.

Zgjedhjet e sotme, poashtu, shihen si madhore pasi sistemi politik i vendit po ndryshon për t’i dhënë më tepër autoritet parlamentit dhe kryeministrit.

Për 150 ulëse në Parlamentin e Gjeorgjisë konkurrojnë 14 parti dhe dy blloqe politike.

Partia në pushtet e presidenti aktual, Mikheil Saakashvili, Lëvizja e Bashkuar Kombëtare, ka dominuar në këtë vend prej “Revolucionit të Trëndëfiltë” në vitin 2003.

Por, tash ajo ballafaqohet me koalicionin opozitar “Ëndrra Gjeorgjiane”, që udhëhiqet nga miliarderi Bidzina Ivanishvili.

Presidenti Saakashvili sot ka votuar në Tbilisi. Ai theksoi se “po vendoset fati i shtetit të Gjeorgjisë”.

“Shumë gjëra po vendosen në këto çaste në vendin tonë, për rajonin, për zhvillimin, për të ardhmen, jo vetëm të këtij kombi, por për atë se çka po ndodhë me ëndrrën evropiane në këtë pjesë të botës, çka ndodhë me idenë e demokracisë në këtë pjesë të botës, çka ndodhë me idenë e reformave në këtë pjesë të botës”, tha Mikheil Saakashvili.

Ai e ka akuzuar rivalin e tij kryesor, Bidzina Ivanishvilin, se po u shërben interesave të Rusisë.

Por, Ivanishvili, i cili pasurinë e tij e ka krijuar në Rusi, i ka hedhur poshtë akuzat se ai do ta kthej prapa Gjeorgjinë në dominimin e Rusisë.

“Ne jemi ekipi të cilit ju mund t’i besoni. Ne jemi ekipi që do ta marrë qeverisjen në duart tona dhe për ta shfrytëzuar për të mirën e popullit. Ne do të fitojmë në zgjedhje”, tha Ivanishvili.

Pasi votoi në kryeqytetin Tbilisi, ai u tha gazetarëve se “kjo është ditë historike në historinë aktuale të Gjerogjisë” dhe ka shfaqur shpresën se për të parën herë “në historinë e Gjeorgjisë, qeveria do të ndryshoj nëpërmjet zgjedhjeve”.

Opozita e akuzon Saakashvilin për sundim autoritar dhe se e ka çuar Gjeorgjinë në luftën shkatërruese me Rusinë, në vitin 2008.
Para zgjedhjeve ka pasur protesta masive kundër brutalitetit policor dhe torturës në burgjet e Gjeorgjisë.

Vëzhguesit e OSBE-së e kanë përshkruar fushatën zgjedhore si “të ashpër dhe konfrontuese”.

Në Gjeorgji gjenden afër 400 vëzhgues ndërkombëtarë të zgjedhjeve.
XS
SM
MD
LG