Banka Botërore ka miratuar fondin prej 80 milionë dollarëve për zhvillim të komunitetit në Birmani.
Kjo është ndihma e parë e Bankës Botërore për këtë vend të Azisë Juglindore në më shumë se 20 vjet.
Sipas Bankës, ky fond pritet të përdoret nga komunitetet rurale për rregullimin e rrugëve, urave, shkollave, klinikave shëndetësore apo tregjeve rajonale në vend.
Sipas zëvendës presidentes së Bankës Botërore për Azi Lindore dhe Pacifik, Pamela Cox, autoritetet e Birmanisë kanë lëvizur shpejt në hapjen e vendit pas shumë viteve të sundimit autoritar, por ende ka nevojë për ndërtim të institucioneve, për ta përmirësuar qeverisjen ekonomike dhe transparencën.
Ajo tha se banka e ka të gatshme edhe një hua prej 165 milionë dollarësh për Birmaninë, pasi qeveria ta shlyejë një borxh prej 900 milionë dollarësh ndaj Bankës Botërore dhe Bankës Aziatike për Zhvillim.