Ndërlidhjet

Rasti i Port Saidit shkakton rebelime të reja në Egjipt

  • RFE /RL

Port Said

Në Egjipt kanë shpërthyer protestat pasi gjykata në Kajro ka konfirmuar dënimet për trazirat vdekjeprurëse të vitit të kaluar, në një stadium futbolli në Port Said.

Tifozët e ekipit të Kajros, Al-Ahly, kanë sulmuar selinë e Federatës së Futbollit të Egjiptit në kryeqytet, duke i vënë asaj flakën.

Në Port Said, qindra protestues kanë kërkuar të ndërpritet trafiku i tragetit të makinave në gjithë Kanalin e Suezit.

Dhuna e vitit të kaluar midis një ekipi lokal të Port Said-it, Al-Masry, dhe klubit Al-Ahly të Kajros ka lënë 74 njerëz të vrarë. Shumica e viktimave kanë qenë tifozë të Al-Ahlyt.

Gjykata në Kajro ka konfirmuar të shtunën dënimet me vdekje kundër 21 personave për rolin e tyre në trazira – që të gjithë ata tifozë të Al-Masryt.

Pesë nga 52 të pandehurit e tjerë janë dënuar me burgim të përjetshëm, ndërsa të tjerët kanë marrë dënime më të vogla ose janë liruar.

Gjykimi në rastin e Port Said-it ka qenë burim i dhunës më të keqe në Egjipt, që nga përmbysja e sunduesit veteran të këtij vendi, Hosni Mubarak, dy vjet më parë.

Tarek Sherif, një avokat që përfaqëson paditësit, ka thënë se vendimi i së shtunës është “i pamjaftueshëm”.

“Nuk mendoj se vendimi është i përshtatshëm, pasi nuk bëhet fjalë për një rast të trazirave në futboll, por për vrasje. Është një rast vrasjeje, i cili nuk është hetuar si duhet dhe procedurat ligjore nuk janë ndjekur saktë”, ka thënë avokati Sherif.

Në mesin e të liruarve sot kanë qenë shtatë nga nëntë oficerët policorë të arrestuar.

Tifozët nga Al-Ahly, që njihen si Ultras, janë zotuar se do të hakmerren nëse të pandehurit, përfshirë edhe policët, lirohen.

“Ultras duhet të shpaguhet nga Ministria e Brendshme, e cila është një konspiratore. Ajo është e ngjashme me ata që kanë planifikuar këtë krim, kështu që policët duhet të marrin dënimin me varje, si të tjerët”, ka thënë një tifoz i Al-Ahlyt, me emrin Mohamed Khattab.

Dhjetëra njerëz janë vrarë në trazirat në Port Said prejse 21 dënimet me vdekje janë shpallur fillimisht në muajin janar.(v.t.)
XS
SM
MD
LG