Ish kryeministri Nawaz Sharif, duket se po lëvizë kah formimi i qeverisë së re të Pakistanit, pas zgjedhjeve të djeshme parlamentare, në të cilat u shënua pjesëmarrje e lartë e votuesve, megjithë kërcënimet dhe dhunën e talibanëve.
Zyrtarë zgjedhorë thanë se dalja në votime ishte afro 60%. Në Pakistan të drejtë vote kanë afro 86 milionë njerëz.
Zoti Sharif, i cili më parë dy herë ka qenë kryeministër i Pakistanit, ka shpallur fitore për partinë e tij opozitare, Lidhja Myslimane, dhe ka bërë thirrje për bashkëpunim nga të gjitha forcat politike.
Shenjat e para sugjerojnë se partia e Sharifit nuk do të ketë mundësi që vetë ta ketë shumicën në Asamblenë Kombëtare, por do të jetë e detyruar ta formojë një koalicion.
Të shtunën në Pakistan janë mbajtur zgjedhjet parlamentare, që janë vlerësuar si historike.
Komisioni Zgjedhor e kishte zgjatur votimin për një orë, për shkak të daljes së madhe të votuesve. Zgjedhësit kanë dalë në votime pavarësisht sulmeve vdekjeprurëse dhe kërcënimeve nga ekstremistët.
Talibanët e Pakistanit i kanë dënuar zgjedhjet duke i cilësuar ato si joislamike dhe e kanë shprehur përkushtimin e tyre për shkatërrimin e zgjedhjeve.
Në qytetin – port, Karaçi, së paku 10 vetë janë vrarë nga sulmi me bombë, që për cak e kishte zyrën e një partie sekulare.
Së paku 5 vetë janë vrarë në luftimet ndërmjet mbështetësve të dy kandidatëve në provincën Baloçistan, që është afër kufirit me Afganistanin.
Në rajonin fisnor Vaziristani Verior, që është bazë e talibanëve, femrave u është thënë që të mos dalin në votime.
Votimi për zgjedhjen e 342 anëtarëve të Asamblesë Kombëtare, shënon herën e parë në historinë 66 vjeçare të Pakistanit, që qeveria civile e ka përfunduar mandatin e plotë dhe e kalon qeverisjen te një administratë tjetër nëpërmjet të zgjedhjeve.
Video nga sulmet në Pakistan.