Ndërlidhjet

logo-print
VOX

Verimet - disa në bregdet, disa në shtëpi


Pamje nga Ulqini (Foto: Gresa Kraja)

Pamje nga Ulqini (Foto: Gresa Kraja)



Pushimet verore tashmë kanë filluar, ndërsa disa të rinj janë duke planifikuar dhe shqyrtuar mundësitë financiare për bregdetet e preferuara dhe vendet turistike. Ndërsa, disa të tjerë, pavarësisht dëshirave për verime, mundësitë financiare nuk lejojnë që të realizohen dëshirat e tyre.

Megjithatë, bregdetet shqiptare vazhdojnë të jenë bregdetet më të pëlqyera dhe me çmime më të arsyeshme, thonë disa të rinj për rubrikën e përjavshme VOX, të Radios Evropa e Lirë.

Atdhe Neziri thotë se gjatë këtij viti ka planifikuar që pushimet t’i kalojë në Ksamil.

“Në Ksamil, 12 ditë apo më shumë. Çmimet janë të njëjta sikurse në Durrës, por vetëm se rruga është më e gjatë. Është vend shumë i bukur”, tregon Atdheu.

Edhe Fatbardha me familje synon që pushimet t’i kalojë në bregdetet shqiptare:

“Unë shkoj zakonisht me anëtarët e familjes në pushim, kështu që ata zgjedhin edhe bregdetin. Por, me siguri në Shqipëri diku. Zakonisht kemi shkuar në bregdetin e Durrësit, por vitin e kaluar kemi qenë në Velipojë dhe me siguri se edhe gjatë këtij viti do të shkojmë në Velipojë”.

Për dallim nga Durrësi, bregdeti i Ulqinit duket të jetë më atraktiv për Sanije Isufin.

“Unë më shumë e preferoj Malin e Zi, sepse ka më shumë atmosferë për të rinjtë. Unë nuk jam e martuar dhe për këtë më pëlqën ndoshta më shumë”, thekson Sanija.

Mërgim Toplani, nga Peja, është student në Departamentin e Gjeografisë dhe thotë se angazhimet për provimet për afatin e shtatorit, nuk lënë hapësirë të mjaftueshme për pushime të gjata. Megjithatë, ai shpreson se ndonjë vikend ta kalojë në Velipojë.

“Kam angazhime për provime. Ndoshta ndonjë vit tjetër, pasi t’i përfundoj obligimet si student i rregullt, meqë është periudhë provimesh, afatet e qershorit - shtatorit. Por, ndoshta ndonjë vikend është afër Velipoja. Ndërsa, paratë duhet t’i siguroj nga prindërit”, shprehet Mërgimi.

Por, Sokol Dema, nga Kaçaniku, punon në Finlandë, ndërsa për pushimet verore ka planifikuar të shëtisë nëpër disa qytete të mëdha evropiane.

“Po, besoj se në Rusi dhe Holandë, pastaj dal në kryeqendra tjera, nëpër metropole. Qejfi më i madh se Stambolli thonë”, tregon Sokoli.

Besa, e cila punon në sektorin publik, dëshiron që pushimet t’i kalojë në Turqi:

“Me dëshirë do të pushoja në Turqi, sepse me fëmijë mund të pushoj vetëm atje. Por, varet nga moti. Krejt qershori shkoi me temperatura të ulëta, korriku dhe gushti është ramazan dhe duhet të koordinohemi më kolegë për punë”.

Në anën tjetër, disa të rinj nuk i fshehin dëshirat për pushime jashtë Kosovës, por megjithatë ana financiare nuk mundëson një gjë të tillë.

Njëra nga to është edhe Mihane Hyseni, studente në Departamentin e Sociologjisë.

“Pushimet do t’i kaloj në shtëpi. Të gjithë kanë nevojë për pushime, por nuk ka mundësi. Edhe prindërit e mi kanë dëshirë të na dërgojnë në ndonjë vend turistik, por nuk kanë mundësi, dhe ne i kuptojmë”, thotë Mihanja.

Ylberi, 24 vjeç, nga Kaçaniku, pushimet verore do t’i kaloj në vendlindje. Ai e vlerëson të vështirë në këtë moshë të kërkojë para nga prindërit për verime.

“Nuk janë kushtet. Unë jam në moshë për të punuar, por nuk mund të gjej ndonjë vend pune. Në këtë moshë është e vështirë të kërkosh para nga prindërit për verime. Kam dëshirë të shkoj në ndonjë bregdet, por nuk mundem”, tregon Ylberi.
  • 16x9 Image

    Nadie Ahmeti

    Me profesionin e gazetarisë ka filluar të merret që prej vitit 2000, kurse Radios Evropa e Lirë i është bashkuar në vitin 2001. Kryesisht mbulon çështjet ekonomike dhe sociale, për çka edhe i janë ndarë disa mirënjohje.

XS
SM
MD
LG