Ndërlidhjet

Moti vështirëson qarkullimin në disa akse rrugore


Ilustrim

Ilustrim

Temperaturat e ulëta dhe reshjet e borës ditëve të fundit në Kosovë, kanë vështirësuar qarkullimin e trafikut në disa akse rrugore, njoftojnë zyrtarë të Policisë së Kosovës.

Ndërkaq, e bllokuar për qarkullim, mbetet rruga Pejë-Kullë për mjetet e rënda transportuese, ndërsa automjetet e vogla mund të qarkullojnë vetëm me pajisje dimërore, njofton Brahim Sadriu, zëdhënës në Policinë e Kosovës.

“Aksi rrugor Pejë- Rozhajë, në drejtim të pikëkalimit kufitar në Kullë, është e bllokuar për autobusë dhe mjete të rënda, ndërkaq është e qarkullueshme për vetura të vogla me pajisje dimërore. Por, kjo vjen edhe si shkak i pjesës së Malit të Zi dhe jo vetëm e pjesës së Kosovës. Rrugët e tjera janë të kalueshme, ka disa vështirësi në disa akse rrugore, mirëpo në përgjithësi janë të kalueshme”, bën të ditur Sadriu.

Si pasojë e reshjeve të borës, thotë zëdhënësi Sadriu, janë raportuar disa aksidente në trafik.

“Nuk është vërejtur ndonjë numër i madh i rritjes së aksidenteve, mirëpo janë raportuar aksidente gjatë natës së kaluar, edhe si pasojë e të reshurave. Rrugët, kur ka ngrica dhe shtresa të borës, kanë vështirësitë e veta gjatë vozitjes edhe mundësitë e frenimit janë më të vogla sesa në rastet kur kemi një rrugë të terur”, shton Sadriu.

Ndryshe, sipas parashikimeve të motit, edhe në ditët në vijim temperaturat do të jenë të ulëta.

Ndërkaq në kryeqytet, ajo që po vështirëson më tepër situatën, është mungesa e ngrohjes në disa lagje të Prishtinës nga ngrohtorja “Termokos”, zyrtarë të së cilës nuk arritën të sqarojnë shkaqet e ndërprerjes së ngrohjes.

Qytetarët thonë se mungesa e ngrohjes po e vështirëson jetën normale. Brendona, studente në Fakultetin Juridik në Universitetin e Prishtinës, e veshur me një pallto të gjatë dhe një shall rreth qafe, tregon se në banesën ku jeton ajo nuk ka ngrohje dhe kjo po ndikon edhe në procesin e të mësuarit.

“Jo ngrohje nuk ka nga ‘Termokos-i’. Po nuk ka pasur asnjëherë dhe as këtë vit nuk do të ketë”, tregon Brendona.

Valdet Beqiri, po ashtu student, por në Fakultetin Ekonomik, thotë se në shtëpinë e tij, nuk varen nga ngrohtorja e qytetit. Por, familja e tij ballafaqohet me një problem tjetër.

“Ne ngrohemi me mjete tjera, me rrymë ose me dru. Por, problem për ne është mungesa e ujit. Edhe në këtë sezon 12orë kemi ujë, ndërsa 12 të tjera nuk kemi ujë”, thotë Valdeti.

Në anën tjetër, zyrtarë të Distribucionit për Furnizim me Energji Elektrike, i njohur me shkurtesën KEDS, sigurojnë qytetarët se gjatë periudhës së dimrit furnizimi me energji elektrike do të jetë i mjaftueshëm.

Në një përgjigje, përmes postës elektronike, Guri Shkodra, nga kjo kompani, thotë se KEDS-i planifikon të importojë energji elektrike në sasi të nevojshme për mbulim të kërkesës së konsumatorëve .

KEDS , thuhet në përgjigje, nuk planifikon të ketë mungesë të energjisë elektrike, por të tilla mund të ndodhin në raste kur në mënyrë të pa-planifikuar njësitë gjeneruese në Korporatën Energjetike të Kosovës ndalojnë së prodhuari energji elektrike.
  • 16x9 Image

    Nadie Ahmeti

    Me profesionin e gazetarisë ka filluar të merret që prej vitit 2000, kurse Radios Evropa e Lirë i është bashkuar në vitin 2001. Kryesisht mbulon çështjet ekonomike dhe sociale, për çka edhe i janë ndarë disa mirënjohje.

Trego komentet

XS
SM
MD
LG