Tre vetë janë vrarë dhe dy të tjerë janë plagosur, nga tri eksplodime në rajonin autonom ujgur të trazuar Xinjiang, në pjesën veriperëndimore të Kinës.
Duke i cituar zyrtarët lokalë, mediat raportojnë se eksplodimet kanë ndodhur sot pasdite.
Pak kohë pas dy eksplodimeve të para, policia i ka arrestuar tre të dyshuar, ndërsa më vonë ka eksploduar një makinë e dyshuar, që ishte e rrethuar nga policia.
Javën e kaluar autoritetet në Xinjiang kanë shpallur se do ta dyfishojnë buxhetin për luftimin e “terrorizmit”, pas një viti të përgjakshëm të sulmeve kundër qeverisë.
Zyrtarët thonë se sulmet janë vepër e separatistëve ujgurë, të inspiruar nga islami radikal.
