Ndërlidhjet

Snowden, Ashton, Thaçi dhe Daçiq – kandidatë për Nobel


Hashim Thaçi (djathtas), Catherine Ashton dhe Ivica Daçiq, gjatl një takimi në Bruksel
Hashim Thaçi (djathtas), Catherine Ashton dhe Ivica Daçiq, gjatl një takimi në Bruksel
Ish-kontraktori i agjencisë së inteligjencës amerikane, Edward Snowden, diplomatja e lartë e BE-së, Catherine Ashton, dhe kryeministrat e Kosovës dhe Serbisë, përkatësisht Hashim Thaçi dhe Ivica Daçiq, janë propozuar për Çmimin Nobel për Paqe për këtë vit, nga liderët evropianë të të gjelbërve dhe socialistëve.

Edward Snowden, aktualisht duke u fshehur në Rusi, zyrtarisht është propozuar nga Grupi i të Gjelbërve në Parlamentin Evropian, për atë që vlerësohet si “kontribut i tij për mbrojtjen e të drejtave tona universale, përfshirë të drejtën për privatësi dhe liri të shprehjes”.

Emrat e zonjës Ashton, Thaçit dhe Daçiqit, personalisht janë propozuar nga presidenti i grupit të socialistëve dhe demokratëve në Parlamentin Evropian, Hannes Swoboda.

Catherine Ashton e ka ndërmjetësuar marrëveshjen për normalizim të raporteve ndërmjet Kosovës dhe Serbisë, që synon përfundimin e konflikteve në Ballkan. Në takimet për arritjen e kësaj marrëveshjeje kanë marrë pjesë kryeministri i Kosovës, Hashim Thaçi, dhe ai i Serbisë, Ivica Daçiq.

Hannes Swoboda tha se atyre duhet tu jepet Çmimi Nobel për Paqe “jo vetëm si shpërblim për progresin e arritur tashmë, por edhe si motivim, mundësisht si shtytje e fundit, e cila është e nevojshme për paqen e qëndrueshme”.

Afati i fundit për nominime për këto çmime prestigjioze është një shkurti, praktikisht më tepër se tetë muaj, para shpalljes së laureatëve, raporton AFP nga Brukseli.
XS
SM
MD
LG