Ndërlidhjet

logo-print

Ban: Viti 2013 - progres substancial politik lidhur me Kosovën


Ban Ki-moon

Ban Ki-moon

Në raportin e fundit për Kosovën, sekretari i përgjithshëm i Kombeve të Bashkuara, Ban Ki-moon, thekson se “duke pasur parasysh marrëveshjet historike me lehtësimin e Bashkimit Evropian të arritura ndërmjet Prishtinës e Beogradit, viti 2013 ishte vit i ndryshimeve domethënëse dhe progresit politik substancial sa i përket Kosovës.

Këtë raport, sekretari Ban do të prezantojë në sesionin e rregullt tremujor për Kosovën, të KS të OKB-së, të hënën më 10 shkurt.

Më tutje, në raportin i cili është publikuar në faqen e Kombeve të Bashkuara në Internet, për zhvillimet në Kosovë në periudhën 16 tetor 2013 e deri më 20 janar të vitit 2014, që shqyrtohet të hënën në Këshillin e Sigurimit të OKB-së, theksohet se “palët e kanë vazhduar implementimin substancial të Marrëveshjes së Parë të Parimeve për Qeverisjen e Normalizimit të Raporteve, të arritur më 19 prill”.

Më tutje, në kuadër të kapitullit “Zhvillimet kryesore politike” të raportit 18 faqesh, përshkruhen gjerësisht zgjedhjet lokale të 3 nëntorit, në të cilat janë përfshirë edhe katër komunat veriore të Kosovës (Leposaviqi, Mitrovica Veriore, Zubin Potoku dhe Zveçani), në harmoni me marrëveshjen e 19 prillit.

Në raport vlerësohet se “zgjedhjet ishin zhvilluar në masë të madhe në mënyrë paqësore në gjithë Kosovën, sipas një kornize të vetme juridike”, dhe theksohet se një numër i rëndësishëm i komunave kanë raportuar substancialisht dalje më të lartë në krahasim me zgjedhjet e mëparshme të mbajtura në vitin 2009.

“Më 3 nëntor, rundi i parë i votimeve kaloi në mënyrë paqësore, me përjashtim të Mitrovicës Veriore, ku persona të paidentifikuar e të maskuar, me dhunë kanë hyrë në dy qendra të votimeve duke e plaçkitur pronën, përkundër masave të zgjeruara të sigurisë”, shkruan në raport për vështirësitë në votimet në Mitrovicën Veriore.

Si pasojë e sulmit, Organizata për Siguri dhe Bashkëpunim Evropian (OSBE) ishte detyruar t’i mbyllë vendvotimet disa orë më herët dhe ta evakuoj personelin e vet nga pjesa veriore e Kosovës, theksohet në raport dhe shpjegohet se “Komisioni Qendror i Zgjedhjeve i Kosovës, urdhëroi rivotim në tri qendra të prekura në Mitrovicën veriore, që u mbajtën më 17 nëntor”.

Më tutje qartësohet se për shkak se kryetari i zgjedhur i komunës është tërhequr, zgjedhjet e reja në Mitrovicën Veriore priten të mbahen më 23 shkurt 2014.

Në pjesën e raportit për siguri, thuhet se “situata e tërësishme e sigurisë në gjithë Kosovën në përgjithësi mbetet e qetë”, por përmendet demonstrata e 6 janarit, e disa qindra njerëzve në Gjakovë, e iniciuar nga asociacioni i nënave të personave të zhdukur, me ç’rast është parandaluar një grup i serbëve të zhvendosur, që të marrin pjesë në një shërbim për Krishtlindjet Ortodokse. “Autobusi me vizitorë ishte sulmuar me gurë të hedhur nga disa demonstrues”, thekson raporti.

Sa i përket kthimit, UNHCR ka raportuar se janë shënuar gjithsej 2660 raste të riatdhesimit të detyruar individual, kryesisht nga vendet evropiane. Autoritetet e Kosovës në muajin tetor kanë miratuar norma të reja që kanë për synim përmirësimin e menaxhmentit të programit të riintegrimit dhe strategjinë e re për riintegrimin e personave të riatdhesuar për periudhën 2014 – 12018, shkruan në raportin e sekretarit të përgjithshëm të Kombeve të Bashkuara, Ban Ki-moon.

Në kapitullin “Observimet”, mirëpritet vendimi i Bashkimit Evropian për fillimin e bisedimeve për pranim me Serbinë dhe negociatat për marrëveshjen e stabilizim asociimit me Kosovën.

Në vitin 2014, “duhet të vazhdojnë përpjekjet për konsolidimin e të arriturave kritike të vitit të kaluar në dialog, së bashku me rrugën drejt pajtimit rajonal, stabilitetit dhe prosperitetit”, thekson raporti.

Ban Ki-moon e falënderon përfaqësuesin e tij special në Kosovë, Farid Zarif, për “udhëheqjen e tij të fuqishme dhe efektive dhe gjithë personelin e UNMIK-ut për dedikimin e tyre në shtyrjen përpara të përgjegjësive të misionit”.

Ai, po ashtu, i falënderon edhe partnerët e Kombeve të Bashkuara në terren, siç janë Bashkimi Evropian, EULEX-i, KFOR-i, OSBE-ja dhe pjesëtarët e familjes së Kombeve të bashkuara në Kosovë, për kontributin e tyre për paqe dhe stabilitet dhe për bashkëpunimin e tyre të ngushtë me UNMIK-un.

Raportit të sekretarit të përgjithshëm të Kombeve të Bashkuara, Ban Ki-moon, i është bashkangjitur edhe materiali i shefit të misionit EULEX, Bernd Borchardt, në të cilin flitet për aktivitetet e këtij misioni.

Në këtë tekst theksohet se “hetimi penal i udhëhequr nga një forcë speciale lidhur me akuzat për rrëmbim, arrestim, keqtrajtim dhe vrasje, si dhe për trafikimin e organeve, në Kosovë ka vazhduar me të shpejtë gjatë periudhës raportuese” dhe konstatohet se “është bërë progres solid në aktivitetet hetuese dhe operacionale”.
  • 16x9 Image

    Fatmir Bujupi

    Fatmir Bujupi, karrierën e gazetarit e filloi në moshën 23 vjeçare në Radio Prishtinë, në vitin 1976, ku punoi për më tepër se 10 vite.  Ka të kryer Fakultetin Teknik – Dega e Makinerisë në Prishtinë. Prej muajit prill të vitit 2000 punon në programin për Kosovën në Radion Evropa e Lirë në Pragë. Është i martuar dhe ka dy fëmijë.

XS
SM
MD
LG