Ndërlidhjet

logo-print
Dy partitë më të mëdha në Kosovë, Partia Demokratike dhe Lidhja Demokratike janë vënë në një garë për të siguruar afër tyre parti më të vogla politike në prag të zgjedhjeve të parakohshme të 8 qershorit.

Ndonëse këto dy subjekte deklarohen se do të garojnë të vetme në zgjedhje, të dyja pranojnë se pas zgjedhjeve, varësisht se cila do të dalë fituese, do të detyrohet të formojë edhe koalicion me parti të tjera për të formuar qeverinë e ardhshme.

Andaj, qysh në këtë fazë, Lidhja Demokratike e Isa Mustafës dhe Aleanca Kosova e Re e Behxhet Pacollit, kanë lidhur një lloj marrëveshje paraprake, e cila sipas asaj që është publikuar deri më tani, do t’i bashkonte këto dy subjekte në një koalicion pas zgjedhjeve.

Pas takimit që lideri i LDK-së, Isa Mustafa dhe ai i AKR-së Behxhet Pacolli zhvilluan në lidhje me këtë koalicion, në një komunikatë për media të LDK-së thuhet se të dy këto parti politike janë pajtuar në parim se ka ngjashmëri në programet e tyre.

“LDK-ja dhe AKR-ja do të garojnë të vetme në zgjedhje, ndërkaq detajet e bashkëqeverisjes pas zgjedhjeve do të konkretizohen në ditët në vijim”, thuhet në komunikatën e LDK-së.

Megjithatë, gjatë ditës, këto parti politike nuk kanë shtjelluar tutje marrëveshjen e arritur në parim.

Gjatë një konference të martën, të liderit të AKR-së, Pacolli, është shmangur të flasë për marrëveshjen me Mustafën duke thënë se kjo çështje do të shtjellohet më vonë.

Afrimi i AKR-së së Pacollit, parti kjo partnere në koalicionin aktual qeverisës me LDK-në e Isa Mustafës, të paktën deklarativisht nuk e ka shqetësuar kryeministrin në largim dhe liderin e PDK-së, Hashim Thaçi.

Ai ka ftuar AKR-në dhe Pacollin që pas zgjedhjeve të vazhdojnë politikën e bashkëpunimit dhe partneritetit.

“Ne kemi një bashkëpunim të shkëlqyer me AKR-në, do të kemi një partner të koalicionit që do të jetë i përafërt me agjendën programin, misionin, vizionin e ri të PDK-së. Prandaj, PDK-ja si parti fituese e zgjedhjeve të 8 qershorit, si parti udhëheqëse e qendrës së djathtë do të ketë një formacionin e vet qeverisës një nga partitë e qendrës së djathtë, ku përfshihet natyrisht edhe partneri aktual”, ka thënë Thaçi.

Bazuar në afatet ligjore të përcaktuara edhe nga Komisioni Qendror i Zgjedhjeve, më 12 maj ka përfunduar afati i paraqitjes së koalicioneve.

Kështu që tani format tjera të bashkimit të partive deri më 16 qershor kur mbyllet afati i aplikimit për pjesëmarrje në zgjedhje, është ai i garimit me listë të përbashkët.

Por në këto raste, partitë e vogla kryesisht do të mund të përfshiheshin në listat e partive të mëdha, pasi që ato nuk do të mund të cilësoheshin më si koalicione.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Trego komentet

XS
SM
MD
LG