Shteti Islamik i Irakut dhe Levanti (ISIL) ka liruar 32 shoferë turq të kamionëve që ka rrëmbyer muajin e kaluar, gjatë marrjes së kontrollit në Mosul të Irakut.
Ministria e Jashtme e Turqisë ka konfirmuar lirimin.
Shoferët janë dorëzuar tek autoritetet në rajonin autonom kurd të Irakut.
Militantët e ISIL-it kanë rrëmbyer edhe 49 turq të tjerë kur kanë sulmuar konsullatën turke në Mosul, në muajin qershor, përfshirë konsullin, pjesëtarët e stafit, rojet dhe tre fëmijë.
Ende nuk ka ndonjë informacion në lidhje me vendndodhjen e tyre.
ISIL-i, grup i ndarë nga Al Kaida, ka shpallur kalifat në territoret që ka pushtuar në Irak dhe Siri.