Presidentja e Kosovës, Atifete Jahjaga është takuar sot me presidentin e Kroacisë, Ivo Josipoviq në Dubrovnik të Kroacisë me të cilin ka biseduar me theks të veçant për bashkëpunimin në fushën e energjisë dhe të infrastrukturës.
Lajmi është bërë i ditur përmes një komunikate të presidencës kosovare ku gjithashtu njoftohet se Jahjaga ka udhëtuar drejt Kroacisë të marrë pjesë në Samitin e Bërdo – Brioni.
“Të dy presidentët theksuan se rajoni i Ballkanit Perëndimor duhet të flasë me një zë për proceset integruese dhe posaçërisht për bashkëpunimin ndërmjet vendeve, që do të ndihmojë edhe përkrahjen e projekteve të përbashkëta rajonale nga BE”, thuhet ndër të tjera në komunikatën e presidencës.
Samiti i Bërdo Brioni që është i treti me radhë do ketë si pjesëmarrëse edhe kancelaren gjermane, Angela Merkel.
Samiti Bërdo-Brioni është një nismë e përbashkët e presidentëve të Sllovenisë dhe Kroacisë për të ndihmuar vendet e rajonit të Ballkanit Perëndimor në procesin e integrimeve evropiane.
