Ndërlidhjet

logo-print

Subjektet parlamentare të pakicave, me kushte në qeverinë e re


Pavarësisht që subjektet parlamentare, të cilat përfaqësojnë bashkësitë pakicë në Kuvendin e Kosovës, në mbledhjen konstituive votuan për kryetar të Kuvendit kandidatin e koalicionin LDK, AAK dhe Nisma, Isa Mustafën, ato nuk janë përcaktuar ende se me kë do të përafrohen për të krijuar qeverinë e re.

Ata thonë se do t’i bashkohen cilido koalicion që ofron kushte më të favorshme për pakicat, qoftë koalicioni, të cilit i prinë Partia Demokratike e Kosovës, qoftë koalicioni LDK, AAK dhe Nisma.

Aleksandar Jablanoviq, kryetar i Listës Serbe, e cila ka fituar 9 ulëse në Kuvendin e Kosovës, thotë se votat nga ky subjekt për Isa Mustafën, nuk nënkuptojnë orientimin edhe orientimin se me kë do të hyjnë në qeveri.

“Ky ka qenë vetëm një veprim i cili duhet të pengoj atë që të mos ndodhin përsëri zgjedhjet në Kosovë. Ne e kemi bërë këtë vetëm që të ruhet stabiliteti parlamentar, në mënyrë që të mos shkohet në zgjedhje të reja. Ne e kemi klubin parlamentar me 10 deputet. Ne nuk kemi asnjë favorit në mesin e partive shqiptare. Për ne janë partner të mundshëm, si njëri ashtu edhe tjetri opsion. Ne do të shohim se cili opsion është i gatshëm për një pajtim të sinqertë dhe bashkëpunim, si dhe për ndërtimin dhe fuqizimin e institucioneve”, tha Jabllanoviq.

Qëndrim të përafërt kanë treguar edhe Mahir Yagxhilar nga grupi parlamentar ‘6 plus”, i cili bashkon gjatë deputet që përfaqësojnë pakicat tjera në Kuvendin e Kosovës.

“Sigurisht që si komunitete do të konsultohemi. Tash ne jemi një grup parlamentar ‘6 plus’. Por, një qëndrim, në parim, ka qenë që votojmë që të mos përsëriten zgjedhjet, si dhe të votojmë atë që e ka shumicën”, theksoi Yagxhilar.

Por, megjithatë, subjektet parlamentare që përfaqësojnë pakicat, kanë dhënë parashenjat se cilat do të jenë parakushtet që do ta definojnë orientimin e tyre për të dhënë votat për formimin e qeverisë së re.

Kryetari i Listës Serbe, Jablanoviq, thotë se për subjektin që ai drejton, janë domethënëse principet mbi të cilat do të duhej të konstituohet qeveria e re, e sidomos ato që ndërlidhen me interesat e serbëve.

Sipas tij, për Listën Serbe, nuk ka rëndësi se cilat ministri do t’i drejtojë dhe kush do të jenë ministrat, por fakti se a do t’i respektoj qeveria e re interesat e serbëve. Jablanoviq thotë se këta interesa ndërlidhen me themelimin sa më të shpejtë të Bashkësisë së komunave serbe, kthimi i pasurisë Kishës Ortodokse Serbe, organizimi më i mirë për kthimin e të zhvendosurve dhe që ky kthim të jetë më i qëndrueshëm, si dhe anulimi i privatizimeve në mjediset ku jetojnë serbët.

“Këto janë katër kushte, pa të cilat ne nuk mund të hyjmë në çfarëdo pushteti, qoftë me njërin qoftë me opsionin tjetër, madje edhe me çmimin që ne të mbesim në opozitë. Në anën tjetër, për ne është shumë domethënëse që situata në Mitrovicë, në veri dhe në jug, të shtendoset maksimalisht, për shkak se është bërë një atmosferë artificiale, kinse atje ka konflikt të madh ndërmjet serbëve dhe shqiptarëve, gjë që nuk është aq e vërtetë".

"Serbët dhe shqiptarët, në mënyrë të papenguar tregtojnë dhe kalojnë nga njëra anë në anën tjetër të qytetit. Por, politika momentale e pushtetit, që aktualisht e udhëheqë Partia Demokratike e Kosovës, sipas mendimit tonë, në Mitrovicë tash për tash, po luan në letrën e nacionalizmit, gjë që për ne është e papranueshme”, ka shpjeguar Jabllanoviq.

Edhe Yagxhilar thotë se do të konsultohen brenda grupit “6 plus” për kushtet eventuale me të cilat mund t’i bashkëngjiten cilitdo koalicion që formon qeverinë. Por, sipas tij, e sigurt është se do t’i bashkëngjiten kujtdo që e siguron shumicën për formimin e qeverisë..

“Si ‘6 plus’, ne do të shikojmë dhe do të bisedojmë, sepse, sigurisht që edhe ne do të vlerësojmë se cila anë ka shumicën. Tash, të shikojmë sipas zhvillimeve, se a do të kërkojmë diçka më tepër dhe si mundet kjo çështje të realizohet”, u shpreh Yagxhilar.

Sido që të jetë, subjektet parlamentare të cilat përfaqësojnë bashkësitë pakicë në Kuvendin e Kosovës, përfaqësimin në ekzekutivin e vendit e kanë të garantuar, varësisht nga numri i resorëve që mund ta ketë qeveria e re.

  • 16x9 Image

    Bekim Bislimi

    Bekim Bislimi ka lindur më 20. 03. 1968 në Vërban të Vitisë. Prej muajit dhjetor të vitit 2001 e deri më tash punon si korrespondent i Radios Evropa e Lirë, për shërbimin në gjuhën shqipe.

Trego komentet

XS
SM
MD
LG