Ministria e Jashtme e Rusisë e ka akuzuar Bashkimin Evropian se e ka tërhequr “fshehtas” ndalesën për furnizimin e Ukrainës me teknologji dhe pajisje ushtarake.
Ministria përmes një komunikate ka thënë sot se “gjatë një takimi të fundit të Këshillit të BE-së në Bruksel, liderët e vendeve anëtare të BE-së janë pajtuar që në fshehtësi të heqin restrikcionet në eksportimin e pajisjeve në Kiev që do të mund të përdoren për represion të brendshëm”.
Komunikata, e cila është postuar në faqen e internetit të ministrisë së jashtme ruse, thotë që “eksportimi i teknologjisë dhe pajisjeve ushtarake është lejuar”.
Ministria gjithashtu i ka bërë thirrje Unionit të 28 shteteve evropiane që të mos nxiten nga Vashingtoni rreth ngjarjeve që po ndodhin në lindje të Ukrainës, ku rebelët prorusë po luftojnë kundër forcave qeveritare.