Ushtria e SHBA-ve, thotë se ka filluar të marrë në pyetje ushtarin amerikan Bowe Bergdahl, në lidhje me zhdukjen e tij në Afganistan, i cili u lirua me pas në shkëmbim të lirimit të pesë talibanëve afganë nga burgu në Guantanamo.
Avokati i tij, Eugene Fidell, tha se klienti që perfaqëson, po bashkëpunon lidhur me hetimin, i cili është duke u zhvilluar në një bazë ushtarake në Teksas, ku punon Bergdahl.
Një zëdhënës nga ushtria deklaroi se Bergdahl është këshilluar për të drejtat e tij nga hetuesit.
Hetimi do të përcaktojë nëse Bergdahl do të ndiqet penalisht për dezertim apo nëse ai do të përballet me ndonjë veprim tjetër disiplinor.
Lirimi i tij kishte shkaktuar kaos politik, sepse administrata Obama nuk e ka njoftuar Kongresin para se të bëjë shkëmbimin.
Disa ushtarë që kanë shërbyer me Bergdahlin e akuzojnë atë për dezertim.
Bergdahl ka qenë i vendosur në lindje të Afganistanit kur është zhdukur në qershor të vitit 2009.
