Policia në shtetin qendror amerikan, Misuri, ka hedhur gaz lotsjellës për t’i shpërndarë protestuesit e zemëruar për shkak të vrasjes së një të riu zezak.
Banorët zezakë të qytetit Ferguson kanë protestuar për katër netë me radhë lidhur me vrasjen e të riut 18 vjeçar, Michael Brown, nga një oficer policie, më 9 gusht.
Afro 40 njerëz janë arrestuar gjatë protestave.
Policia tha se Brown ishte përleshur me policin në veturën policore, por dëshmitarët kanë thënë se Brown i paarmatosur ishte qëlluar disa herë, derisa largohej nga polici.
Liderët për të drejtat e njeriut janë tubuar në Ferguson, qytet me dy të tretat e popullatës afrikano-amerikane, për të biseduar me protestuesit.
Zyrtarët e kanë supsenduar policin, i cili e ka qëlluar të riun Brown, por kanë refuzuar ta zbulojnë emrin e tij, për shkak të kërcënimeve fizike ndaj tij.
Presidenti amerikan, Barack Obama, ka kërkuar përgjigje të qetë nga protestuesit ndaj këtij rasti.