Një mjek liberian i infektuar me sëmundjen Ebola dhe i trajtuar me ilaçin eksperimental Zmapp, ka vdekur në Liberi.
Ministri i informatave i Liberisë, Lewis Brown, tha se mjeku, Abraham Borbor, ka vdekur sot.
Më herët, dy shtetas amerikanë, që ishin sjellur nga Afrika Perëndimore me këtë virus, janë mjekuar duke u trajtuar me ZMapp.
Nuk është e njohur nëse ky ilaç direkt ka ndihmuar në shërimin e tyre.
Nga ana tjetër, një punonjës shëndetësor britanik i cili u infektua me virusin Ebola në Siera Leone, është pranuar në spital në Londër, pasi ishte evakuar dje nga Afrika.
Nga përhapja e Ebolës deri tash kanë vdekur më tepër se 1400 vetë në Guine, Liberi dhe Siera Leone. Pesë vetë kanë vdekur në Nigeri.
Republika Demokratike e Kongos dje ka konfirmuar dy vdekjet e para nga Ebola këtë vit, por autoritetet kanë pretenduar se këto dy raste nuk ishin të ndërlidhura me epideminë në Afrikën Perëndimore.