Asociacioni i Gazetarëve të Kosovës dënon ashpër kërcënimet me jetë ndaj gazetarit të Gazetës Express, Visar Duriqi.
“AGK është njoftuar për dhjetra kërcënime me vdekje, duke përfshirë kërcënime me prerje koke nga persona të ndryshëm, për shkak të shkrimeve të tij, të cilat Duriqi i ka raportuar si vrasje në tentativë tek autoritetet e sigurisë në vend”, thuhet në reagimin e tyre.
Gazetari Duriqi së fundi ka mbuluar një varg temash lidhur me ekstremizmin fetar dhe grupet radikale në Kosovë.
Kërcënimet e ngjashme dhe neglizhenca e autoriteteve të sigurisë në vend karshi veprimeve radikale të ngritura nga mediet janë shqetësim serioz për jetën e gazetarëve.
AGK po e përcjellë me vëmendje situatën e krijuar dhe kërkon nga Ministria e Punëve të Brendshme që të zhvilloj hetime serioze ndaj të gjitha palëve të përfshira, thuhet më tej në reagim.
Ndaj kërcënimeve të gazetarit Duriqi kanë reaguar edhe Reporterët pa Kufij.
