Votuesit në Ukrainë tashmë po votojnë në zgjedhjet parlamentare të cilat pritet se do ta vendosin këtë vend në rrugën properëndimore, të cilën presidenti Petro Poroshenko, më herët e kishte cilësuar si “historike”.
Vendvotimet janë hapur në orën 7 të mëngjesit dhe do të mbyllen në orën 19, sipas kohës së Evropës së Mesme.
Në fjalimin e tij para zgjedhjeve, presidenti Petro Poroshenko, tha se me këto votime kompletohet “transferi i autoritetit”, që filloi kur ish-presidenti prorus, Viktor Yanukovich, ishte përmbysur pas protestave masive në muajin shkurt të këtij viti.
Poroshenko u ka bërë thirrje votuesve që t’i zgjedhin anëtarët e Parlamentit “që nuk janë të korruputar, janë proevropianë dhe proukrainas, e jo prosovjetikë”.
Në Ukrainë janë të regjistruar afro 36.5 milionë votues, por më se 4 milionë janë të vendosur në pjesën lindore të Ukrainës, në rajonet Donjeck dhe Luhansk, që janë nën kontrollin e separatistëve prorusë, të cilët nuk lejojnë mbajtjen e votimeve.