Programi "Mundësitë e reja për bujqësi" i përkrahur nga Agjencia e Shteteve të Bashkuara të Amerikës për Zhvillim (USAID), ka shënuar të enjten përfundimin e punës.
Programi i cili ka zgjatur katër vjet, ishte fokusuar në agrokulturë, kryesisht prodhime të reja në Kosovë, duke përfshirë prodhimin e mjedrës, boronicat , asparagu, trangujt e vegjël, dredhëzat, bimët mjekësorë dhe prodhimet të tjera.
Në konferencën përmbyllëse, përfaqësuesit e USAID-it, kanë treguar se përgjatë kësaj kohë janë futur 149 teknologji dhe praktika të reja të menaxhimin, ku më shumë se 3000 fermerë i kanë përvetësuar këto praktika.
Po ashtu gjatë konferencës, është bërë e ditur se ky program ka ndihmuar në gjenerimin e më shumë se 6 mijë vendeve të punës me orar të plotë si dhe ka mundësuar krijimin e lidhjeve tregëtare në nivele lokale, rajonale dhe evropiane me eksporte të suksesshme të pemëve dhe perimeve të freskëta.
Agjencia e Shteteve të Bashkuara të Amerikës për Zhvillim (USAID), ka ofruar ndihme ekonomike dhe humanitare për më tepër se 40 vjet.
