Presidenti i Rusisë, Vladimir Putin, e ka urdhëruar qeverinë që ta ndalë rritjen e çmimit të alkoolit vodka, në periudhën e përkeqësimit të krizës ekonomike.
Gjatë një takimi të mbrëmshëm me zyrtarët qeveritarë dhe guvernatorët rajonalë në Moskë, zoti Putin tha se çmimet e larta të vodkës e kanë inkurajuar prodhimin ilegal të këtij alkooli, që paraqet rezik më të madh për shëndetin e popullit, se sa vodka e prodhuar legalisht.
Rusia ballafaqohet me krizën më të keqe ekonomike prej vitit 1998, ndërsa monedha rubla e ka humbur vlerën për shkak të rënies së çmimeve të naftës dhe sanksioneve perëndimore, për shkak të rolit të Moskës në Ukrainë.
Inflacioni i pritur vjetor pritet të jetë mbi 10%.
