Armëpushimi në Ukrainë, i cili ka hyrë në fuqi në mesnatë, është duke u mbajtur, pavarësisht raporteve për disa granatime të vogla.
Pikë kryesore e shqetësimit mbetet zona përreth qytetit Debaltseve, ku ditëve të fundit ka pasur luftime të rënda midis forcave qeveritare dhe rebelëve pro-rusë.
“Forcat e armikut janë ende të përqendruara në Debalsteve dhe në qytetin Shirokino. Situata e përgjithshme në lindje të Ukrainës tregon shenja të stabilizimit”, ka thënë zëdhënësi i ushtrisë së Ukrainës, Andriy Lysenko.
Marrëveshja për armëpushim është arritur të enjten në Minsk nga presidenti i Ukrainës, Petro Poroshenko, ai i Rusisë, Vladimir Putin, i Francës, Francois Hollande, dhe kancelarja gjermane, Angela Merkel.
Kievi dhe Perëndimi akuzojnë Moskën se ndihmon separatistët me armë dhe trupa të saj.
Moska i hedh poshtë akuzat.
Konflikti në lindje të Ukrainës ka nisur qysh në prill të vitit të kaluar dhe ka marrë mbi 5,400 jetë njerëzish.