Komandanti lartë i NATO-s, gjenerali amerikan Philip Breedlove, tha sot pasdite në Prishtinë se të gjitha vendet në Evropë janë të kërcënuara nga terrorizmi dhe po përballen me atë që ai e quajti “valën e luftëtarëve të huaj”.
“Ky problem do të bëhet më i madh në të ardhmen para se të bëhet më i vogël”, tha ai, duke bërë thirrje për një angazhim të përbashkët në përballje me këtë problem.
Gjenerali amerikan, në një takim me gazetarët në Prishtinë, përmendi edhe migrimin e qytetarëve të Kosovës, duke thënë se ky fenomen është një “tregues se njerëzit nuk po gjejnë mundësitë që u duhen në këtë vend”.
Ai gjithashtu foli edhe për situatën në Ukrainë, duke thënë tërhequr vërejtjen se në lindje të Ukrainës, Rusia ka krijuar "një armatë të frikshme, e cila është e pajisur dhe armatosur mirë".
Gjenerali amerikan ka shprehur shqetësimin e tij për vazhdimin e luftimeve në lindje të Ukrainës, duke bërë thirrje për respektim të armëpushimit, e cila ka hyrë në fuqi më 15 shkurt.
