Kryeministri i Zelandës së Re, John Key, ka bërë publike planet për dërgimin e 143 trupave joluftarake në Irak, për të ndihmuar luftën kundër militantëve të Shtetit Islamik (IS).
Key ka thënë se shumica e personelit do të jetë e stacionuar me trupat australiane në kampin Taji, në veri të Bagdadit.
Ai ka thënë se Zelanda e Re “ka obligim të mbështesë stabilitetin dhe sundimin e ligjit ndërkombëtarisht”.
Autoritetet kanë thënë vitin e kaluar se midis 35 dhe 40 shtetas të Zelandës së Re kanë qenë në listën e vëzhgimit terrorist.
Disa nga ta kanë udhëtuar në Siri për të luftuar me Shtetin Islamik, ndërsa të tjerët kanë qenë të përfshirë në financimin e ekstremizmit ose në radikalizimin e njerëzve të tjerë.
Key ka thënë se misioni i ri, i cili pritet të fillojë në muajin maj, do të ndihmojë në trajnimin e forcave speciale të Irakut dhe se pason kërkesën e Qeverisë irakiane.
Dislokimi do të rishikohet pas nëntë muajsh dhe nuk do të zgjasë më shumë se dy vjet.