Holanda ka thënë se pas identifikimit të gati të gjitha viktimave nga rrëzimi i aeroplanit të kompanisë Malaysia Airlines në Ukrainë, përpjekjet janë zhvendosur për të gjetur përgjegjësit e hedhjes poshtë të avionit.
Kështu ka thënë ministri i Jashtëm holandez, Bert Koenders.
Fluturimi MH17 është rrëzuar më 17 korrik të vitit të kaluar, duke shkaktuar vdekjen e të 298 njerëzve në bord, shumica nga ta holandezë.
Muajin e kaluar, mediat holandeze kanë raportuar se një rrënojë e metalit, e gjetur në vendin e fatkeqësisë, përkon me një raketë të prodhimit rus.
Rusia ka thënë se aeroplani është rrëzuar nga ushtria e Ukrainës.