Papa Françesk i ka bërë thirrje Bashkimit Evropian për ta ndihmuar më tepër Italinë, për shkak të numrit në rritje të imigrantëve që kërkojnë shpëtim në Detin e Mesdheut, duke lundruar me anije të pasigurta për të ikur nga lufta, ndjekja apo varfëria.
Këto komente Papa i ka bërë gjatë takimit me presidentin e Italisë, Sergio Mattarella, mbrëmë në Vatikan.
Papa tha se është “evidente se proporcionet e fenomenit kërkojnë involvim shumë më të gjërë”.
Ai ka kërkuar “përkushtim më të gjërë në nivelin ndërkombëtar dhe evropian”.
Papa Françesk e ka falënderuar Italinë për shpëtimin dhe strehimin e refugjatëve dhe imigrantëve të tjerë, numri i të cilëve ka arritur në 200 mijë, prej fillimit të vitit 2014.
Vetëm javën e kaluar kanë arritur më se 10 mijë vetë.
Italia thotë se do ta vazhdoj shpëtimin e imigrantëve që mashtrohen nga trafikantët dhe braktisen në det, por ka kërkuar që Bashkimi Evropian ta rrisë ndihmën për strehim dhe shpëtim të imigrantëve.