Ndërlidhjet

Rritja ekonomike njëshifrore, e pamjaftueshme


Ekspertë të çështjeve ekonomike në Prishtinë, japin mendime të ndryshme sa i përket rritjes ekonomike në Kosovë.

Rritja ekonomike që ata e parashikojnë në një periudhë afatmesme nuk mund të shkojë deri në pesë për qind.

Eksperti i çështjeve ekonomike, Ibrahim Rexhepi thotë për Radion Evropa e Lirë se nëse Kosova do të fillojë zbatimin e reformave ekonomike të cilat i ka proklamuar se fundi në vitin 2016, Kosova mund të shënojw rritje ekonomike deri në 5 për qind.

Këtë rritje, siç thekson Rexhepi, mund ta nxisin disa ndryshime që janë paraparë nga qeveria, siç është ofrimi i masave stimuluese për bizneset dhe krijimi i lehtësirave fiskale si për punësim dhe investime.

“Efekti i këtyre masave nuk mund të vërehet menjëherë as brenda një viti, por ndoshta duhet të pritet më gjatë. Megjithatë, nëse tash fillohet më këto reforma atëherë rritja ekonomike do të jetë shumë më e madhe se 3 për qind, së paku do të shkojë deri4.5 apo deri në 5 për qind”, thekson Rexhepi.

Ekonomia në Kosovë gjatë viteve të fundit nuk ka arritur të shënojë rritje as deri në katër për qind, pavarësisht dokumenteve të qeverive ku rritja ekonomike ishte parashikuar deri në 8 për qind.

Përderisa në vitin 2010 rritja ekonomike ka qenë 5.39 për qind, në vitin 2011 po ashtu mbi pesë për qind, në katër vitet e fundit kjo rritje fillon të ulet dhe atë në tre për qind.

Drejtori ekzekutiv i Institutit për Hulumtime të Avancuara Agron Demi thotë se projeksionet ekonomike të Qeverisë së Kosovës çdo herë kanë qenë shumë më të mëdha sesa rritja reale ekonomike.

Ai kujton se edhe në kornizën afatmesme të shpenzimeve thuhet se rritja ekonomikedo të jetë në një trend mesatar 5 për qind, por në fund ajo nuk arrin as tre për qind

“Edhe me politikat qeveritare që janë bërë deri më tani nuk mund tt pritet që zhvillimi ekonomik të jetë më i lartë se 3 për qind edhe në periudhën afatmesme. Viteve të fundit investimet publike kishin kontribuar në zhvillimin ekonomik, por që tani jemi duke parë se këto investime publike janë duke u zvogëluar dhe duke u transferuar në paga dhe mëditje”, shton Demi.

Kryeministri i Kosovës, Isa Mustafa, ka premtuar se do të bëhen reforma në ekonomi dhe se do të ofrojë mbështetje të madhe për sektorin privat.

Mustafa ka theksuar se rritja ekonomike në vitin 2015 do të jetë do të të jetë mbi katër për qind.

Sidoqoftë, Agron Demi nga Instituti për Hulumtime të Avancuara thekson se me këtë rritje ekonomike nuk mund të arrihet krijim i vendeve të reja të punës dhe përmirësimi i gjendjes sociale dhe ekonomike.

“Qeveria e Kosovës deri më tani fatkeqësisht nuk ka dhënë shenja se do të ketë zhvillim ekonomik në trende më të larta. Në anën tjetër kryeministri i Kosovës Isa Mustafa e ka pranuar se premtimet e fushatës zgjedhore për rritje ekonomike dhe punësim janë të parealizueshme”, thekson Demi.

Që Kosova të përmirësojë gjendjen ekonomike dhe sociale, ekspertët e çështjeve ekonomike vlerësojnë se rritja ekonomike duhet të të jetë 8 deri në 10 për qind.

XS
SM
MD
LG