Përfaqësuesit e qeverisë së Ukrainës dhe ata të kryengritësve janë takuar sot në Minsk të Bjellorusisë, për të parën herë prej se të dy palët e kishin arritur marrëveshjen për armëpushim në muajin shkurt.
Në këtë takim me dyer të mbyllura, kanë marrë pjesë edhe përfaqësuesit e Rusisë dhe të Organizatës për Siguri dhe Bashkëpunim në Evropë (OSBE), dhe është disktuar për mënyrat për fuqizimin e armëpushimit të dobësuar në pjesën lindore të Ukrainës.
Kievi dhe kryengritësit prorusë e akuzojnë njëri-tjetrin për vazhdim të shkeljes së armëpushimit.
Ish-presidenti i Ukrainës, Leonid Kuchma, që e udhëhoqi delegacionin e Kievit, tha pas takimit se ky ishte “hap serioz kah zgjidhja politike” e konfliktit, por ka shprehur nevojën për sigurim të ndaljes së të shtënave në mënyrë të plotë.
Kuchma u tha gazetarëve se përfaqësuesit e separatistëve ishin “konstruktivë”.
Në këtë takim janë formuar grupet e punës dhe pritet që ta fillojnë aktivitetin për gjetjen e hapave të ardhshëm që parashihen në planin për armëpushim.
Përfaqësuesi i OSBE-së, Heidi Tagliavini, tha se grupet e para do ta fillojnë punën më 9 maj.
Këto bisedime u zhvilluan derisa Ukraina ka njoftuar se pesë ushtarë të saj janë vrarë në pjesën lindore të këtij vendi, gjatë 24 orëve të fundit.