Bashkimi Evropian dje e ka denoncuar vendimin për dënim me vdekje për presidentin e përmbysur të Egjiptit, Muhammed Morsi, dhe së paku 100 persona të tjerë.
Përfaqësuesja e lartë e BE-së për politikë të jashtme dhe siguri, Federica Mogherini, në një deklaratë për media tha se “vendimi i gjykatës për të kërkuar dënim me vdekje, është marrë në fund të procesit masiv, që nuk është në harmoni me obligimet e Egjiptit, sipas së drejtës ndërkombëtare”.
Mëtutje ajo theksoi se BE-ja beson se vendimi do të rishqyrtohet pas apelit dhe ka shtuar se “BE-ja e kundërshton dënimin me vdekje në të gjitha rrethanat, pasi është mizor dhe jonjerëzor”.
Shtetet e Bashkuara dje më herët gjatë ditës kanë shprehur shqetësim për dënimin me vdekje, duke thënë se “kanë folur vazhdimisht kundër praktikës së gjykimeve dhe dënimeve masive”.
Morsi ishte në mesin e më se 100 të akuzuarve, që nga gjykata u dënuan me vdekje për rolin e tyre në një ikje masive nga burgu, gjatë kryengritjes së vitit 2011.
Morsi ishte presidenti i parë i Egjiptit i zgjedhur në votime të lira.
Ai ishte përmbysur nga ushtria në korrik të vitit 2013, pas disa protestave masive, që ishin shkaktuar nga politikat e tij përçarëse.
