Zyrtarët afganë thonë se së paku 12 policë janë vrarë nga një pritë e militantëve talibanë, në pjesën e trazuar jugore të këtij vendi.
Raportohet se sulmi në provincën Helmand ka ndodhur mbrëmë vonë, në qarkun Musa Qala, që konsiderohet bazë e fuqishme e talibanëve.
Tashmë, talibanët e kanë marrë përgjegjësinë për këtë sulm.
Zyrtarët afganë thonë se edhe militantët talibanë, po ashtu, kanë pësuar humbje.
Prej se ushtria e Afganistanit e ka filluar një ofensivë në muajin prill të këtij viti, militantët talibanë i kanë sulmuar pikat e kontrollit të policisë afgane.
Nga një sulm i tillë muajin e kaluar, po ashtu në Helmand, janë vrarë 19 policë.
Forcat e sigurisë së Afganistanit po luftojnë kundër kryengritësve, pasi shumica e ushtarëve të Shteteve të Bashkuara dhe të vendeve të tjera, janë tërhequr në fund të vitit 2014.
