Hetuesit e Kombeve të Bashkuara kanë dënuar përdorimin e bombave fuçi në luftën e Sirisë.
Paulo Pinheiro, i cili kryeson komisionin hetimor të situatës së të drejtave të njeriut, ka thënë sot se “dështimi i palëve luftuese për të mbrojtur civilët, ka çuar në vuajtje të papërshkrueshme”.
Pinheiro ka shprehur zemërim të veçantë për, siç ka thënë, efektin shkatërrues që kanë rrethimet e banorëve nga forcat qeveritare, nga grupet e armatosura anti-regjim dhe nga militantët e Shtetit Islamik (IS).
Mbi 230,000 njerëz kanë humbur jetën në luftën e Sirisë, e cila ka nisur qysh në mars të vitit 2011.
Mbi 10 milionë, ndërkaq, janë larguar nga shtëpitë e tyre.