Ukraina thotë se në rebelët e mbështetur nga Rusia, kanë nisur një prej sulmeve më të ashpëra në lindje të vendit, që prej se është nënshkruar marrëveshja e armëpushimit në muajin shkurt, në Minks të Bjellorusisë.
Në 24 orët e fundit raportohet se janë vrarë 8 ushtarë ukrainas dhe janë plagosur 16 të tjerë.
Këshilli i Sigurisë i Ukrainës ka thënë sot se “tre ditët e fundit kanë ndodhur bombardimet më intensive në territorin ukrainas që prej se është nënshkruar marrëveshja e Minskut”.
Në deklaratë thuhet se rebelët kanë bombarduar pozicionet ukrainase me topa por nuk kanë dhënë detaje se në çfarë vendi kanë ndodhur këto bombardime.
“Ngjarjet e fundit janë dëshmi për tentimin e radhës të Rusisë që të shkelë marrëveshjen e Minkut dhe të rifillojë aktivitetin e saj ushtarak”, thuhet tutje në deklaratë.
Forcat qeveritare ukrainase dhe rebelët pro-rusë e akuzojnë njëra-tjetrën për shkelje të armëpushimit.
Më shumë se 6,500 njerëz janë vrarë që prej se kanë filluar filluar luftimet në prill të vitit 2014.
