Autoritetet taxhike thonë se mediat në Taxhikistan nuk mund të raportojnë lajme zyrtare pa e cituar agjencinë shtetërore të lajmeve.
Shërbimi për media i Presidencës taxhike ka thënë sot se mediat duhet paraprakisht t’ia dërgojnë raportet e tyre agjencisë së informimit Khovar, ndërkaq mediat e huaja që punojnë në Taxhikistan mund të përdorin lajme vetëm duke e cituar agjencinë Khovar.
Ky vendim i autoriteteve është dënuar nga Nuriddin Karshivoev, i cili është kryetar i Asociacionit Kombëtar të Mediave të Pavarura të Taxhikistanit.
Presidenti taxhik Emomali Rahmon është në krye të shtetit që prej vitit 1992.
Qeveria e tij është kritikuar për shkak të arrestimit të disidentëve dhe për kontrollin ndaj mediave.