Sekretari amerikan i shtetit, John Kerry, tha se Shtetet e Bashkuara dhe Evropa po i kthehen raporteve me Egjiptin në një “bazë më të fortë”, përkundër tensioneve dhe shqetësimeve aktuale lidhur me të drejtat e njeriut në këtë vend.
“Egjipti mbetet vital... për angazhim dhe stabilitet në rajon si të tërë”, tha sot Kerry në Kajro, pas bisedimeve me minsitrin e jashtëm të Egjiptit, Sameh Shoukry.
Raportet bilaterale ndërmjet dy vendeve u ftohën pas përmbysjes së presidentit islamist, Mohamed Morsi, nga ushtria e Egjiptit, pas demonstratave të mëdha kundër presidencës së tij.
Megjithatë, Egjipti mbetet njëri nga aleatët e afërt të sigurisë për Shtetet e Bashkuara në Lindjen e Mesme, rajon që është goditur rëndë nga trazirat në Siri, Irak, Jemen dhe Libi.
Takimi Kerry – Shoukry u bë një ditë pasi Shtetet e Bashkuara ia dërguan Egjiptit tetë aeroplanë luftarakë të tipit F-16.