Prokurori i shtetit të Azerbajxhanit ka kërkuar nga gjykata në Baku që të dënojë aktivisten e të drejtave të njeriut, Leyla Yunus, me 11 vjet burgim.
Në një deklaratë të dërguar në Gjykatën për Krime të Rënda, prokuori po ashtu ka kërkuar që të dënohet edhe bashkëshorti i Leylas, Arif Yunus, me nëntë vjet burgim.
Çifti është akuzuar për tradhti, mashtrim, falsifikim, evazion fiskal dhe aktivitete të paligjshme biznesore.
Gjykimi i tij ka nisur më 27 korrik.
Leyla Yunus ndodhet në burg qysh në korrik të vitit 2014, ndërsa bashkëshorti i saj qysh në gusht të vitit të kaluar.
Të dy ata janë në gjendje të keqe shëndetësore.
Leyla Yunus, 59 vjeçe, dhe bashkëshorti i saj, Arif, 60 vjeç, janë në mesin e dhjetëra aktivistëve, gazetarëve dhe kritikëve të qeverisë që janë burgosur në Azerbajxhan.
Grupet e të drejtave të njeriut thonë se presidenti Ilham Aliyev po bën fushatë për të heshtur kundërshtarët.