Shërbimi për shtyp i Kremlinit ka bërë të ditur se presidenti rus, Vladimir Putin, ka mbajtur një “takim operativ” me anëtarët e Këshillit për Siguri të Rusisë, në lidhje me përshkallëzimin e dhunës në lindje të Ukrainës.
Kremlini ka thënë se në fokus të takimit kanë qenë sulmet kundër separatistëve pro-rusë dhe banorëve në lindje të Ukrainës, duke lënë të kuptohet se sulmet janë kryer nga forcat qeveritare të Ukrainës.
Deklarata e Kremlinit vjen një ditë pasi Bashkimi Evropian ka akuzuar separatistët pro-rusë për intensifikimin e sulmeve në zonat që kontrollohen nga qeveria, në lindje të Ukrainës.
BE-ja ka thënë se separatistët po shkelin marrëveshjen për armëpushim, të arritur në muajin shkurt në Minsk.