Afganistani e ka ftuar ambasadorin e Pakistanit për ta shpjeguar përleshjen ndërmjet forcave të sigurisë së dy vendeve fqinje, nga të cilat u vranë tetë kufitarë afganë.
Ministria e jashtme e Afganistanit, ka deklaruar mbrëmë vonë se është seriozisht e shqetësuar për të shtënat e rënda artilerike nga forcat e Pakistanit, kundër pikave kufitare në provincën afgane, Kunar.
Në kumtesë theksohet se “vazhdimi i lëvizjeve të tilla nga ushtria e Pakistanit do të ketë efekte të kundërta në marrëdhëniet bilaterale”.
Afganët e kanë shprehur sot zemërimin e tyre kundër Pakistanit në rrugët e kryeqytetit Kabul, gjatë festimit të Ditës së Pavarësisë.
Me këto ceremoni për Ditën e Pavarësisë, shënohet përvjetori i Marrëveshjes Anglo-Afgane të vitit 1919, që ishte një marrëveshje e armëpushimit me forcat koloniale britanike, të cilat i kishin dhënë Afganistanit vetëvendosje në punët e jashtme.
