Nga Rusia raportohet se një gjykatë rajonale në Pskov sot e ka dënuar oficerin e Shërbimit të brendshëm të Estonisë, Eston Kohver, me 15 vjet burgim dhe e ka gjobitur me 13 mijë dollarë, lidhur me akuza për spiunim.
Në vendimin e gjykatës thuhet se ai duhet ta mbajë dënimin me burg në Rusi.
Estonia i ka hedhur poshtë akuzat duke thënë se Kohver ishte zënë në pritë në territorin e Estonisë nga agjentët rus, të cilët e kishin rrëmbyer atë dhe e kishin dërguar në territorin rus, më 5 shtator të vitit 2014.
Mëtutje, autoritetet e Estonisë thanë se Eston Kohver ishte afër kufirit për takim me një informator të besueshëm lidhur me hetimet për një operacion të dyshuar kontrabandues, nga një grup i krimit të organizuar, kur ishte rrëmbyer në një operacion të planifikuar mirë.
