Kryeministri i Irakut, Haider al-Abadi, tha se beteja për qytetin verior, Baixhi, dhe për rafinerinë e naftës në të, që është më e madhja në Irak, është e rëndësisë madhore në luftën për t’i shkaktuar disfatë grupit militant, Shteti Islamik (IS).
“Fitorja në këtë betejë është kritike për përfundimin e pranisë së IS-it në Irak”, tha zoti Abadi, derisa i ka vizituar komandantët ushtarakë në provincën Salahudin.
Baixhi, që gjendet 120 kilometra në veri të kryeqytetit Bagdad, është qendër e betejës, prej se është okupuar nga militantët në qershor të vitit 2014.
Pjesëtarët e grupit ekstremist, Shteti Islamik, e kanë marrë kontrollin ndaj territoreve të gjëra në pjesën veriore të Irakut.
Për shkak të shkatërrimeve të mëdha, qyteti Baixhi pothuajse ka mbetur pa banorë, ndërsa rafineria nuk është funksionale.