Ndërlidhjet

Kosova feston Kurban Bajramin – thirrje për solidaritet me refugjatët


Kosovë...foto nga arkivi

Kosovë...foto nga arkivi

Besimtarët myslimanë në Kosovë po festojnë sot Kurban Bajramin me lutjet dhe urimet për paqe, dashuri dhe solidaritet ndaj njëri - tjetrit.

Kjo festë karakterizohet me kurorëzimin e Haxhit dhe flijimin e kurbanit apo therrjen e dashit.

Sikurse edhe festat tjera fetare, edhe për Kurban Bajram realizohen vizita nëpër familje, fqinjësi, miq e farefis, ku njerëzit urojnë njëri tjetrin për shëndet dhe jetë të begatë.

Manifestimi qendror kushtuar festës së Kurban – Bajramit është mbajtur në Xhaminë e Madhe në Prishtinë.

Ligjëratën tematike kushtuar kësaj feste e ka mbajtur Kryeimami i Bashkësisë Islame të Kosovës, Sabri Bajgora. Pasi që ka folur për Festën e Kurban Bajramit ai ka rikujtuar edhe disa nga parimet kryesore të fesë islame.

“Të gjithë ne duhet ta ndiejmë vetën krenar që i përkasim kësaj feje të ndritshme, kaq të pastër, kësaj feje të paqes, të mëshirës, të dashurisë e cila qëllim parësor ka respektin e njëri tjetrit, dashurinë që duhet ne ta shprehim ne ndaj njëri tjetrit sepse vet fjala islam është fjalë e paqes”, ka thënë Bajgora.

Mesazhin kryesor për Kurban Bajram e ka adresuar Myftiu i Kosovës, Naim Tërnava. Ai është lutur që Kosova të tejkaloj problemet në mënyrë që të gjithë qytetarët e saj të gjejnë mirëqenien.

Po ashtu, ai është lutur që vendet e përfshira në luftë, që nga Iraku e Siria, të gjejnë paqen.

Njëherësh ka bërë thirrje për solidaritet me refugjatët të cilët kanë vërshuar Evropën nga vatrat e krizës.

“Lutemi që më parë vendet në konflikte të gjejnë paqen. Lutemi që sa më parë popujt e Sirisë e Irakut të gjejnë paqen e qetësinë, ndërsa të dëbuarit, refugjatët nga këto vende të gjejnë solidaritet, humanitetin dhe bamirësinë e popujve të lirë. Nuk guxojmë të jemi indiferent ndaj asaj që po troket në dyert tona – nga vuajtjet e refugjatëve nga Siria. Ftoj të gjithë që të jemi solidar e bamirës me refugjatët përvuajtur, e kemi urdhër nga Zoti të përkujdesemi për ta”, ka thënë Myftiu Tërnava.

Bashkësinë Islame dhe të gjithë besimtarët mysliman në Kosovë i kanë uruar edhe udhëheqësit më të lartë të institucioneve dhe partive politike të Kosovës.

Ata kanë uruar që kjo festë të jetë festë e unitetit, e arsyes, ku do të ketë mirëkuptim, mirëqenie dhe zhvillim ekonomik.

  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

XS
SM
MD
LG