Shtetasi rus, Vitaly Makarov, është dënuar me dy vjet burg, për shkak se ka luftuar për militantët islamikë në Siri.
Dega rajonale e Shërbimit federal të sigurisë së Rusisë ka njoftuar se Makarov, i kovertuar në islam, ishte shpallur fajtor nga një gjykatë në Rusi, për shkak se ka marrë pjesë në operacionet ushtarake në Siri, në periudhën 2013 – 2014, në radhët e një grupi të armatosur ilegal, i cili ishte lojal ndaj militantëve të Shtetit Islamik (IS).
Personi i dënuar, Vitaly Makarov, po ashtu i njohur edhe me emrin e tij mysliman, Yusuf, e ka pranuar fajësinë.
Zëvendësdrejtori i parë i Shërbimit federal të sigurisë në Rusi, Sergei Smirnov, më herët këtë muaj, ka thënë se afro 2,400 shtetas të Rusisë po luftojnë në radhët e militantëve të Shtetit Islamik dhe grupet e tjera ekstremiste myslimane në Siri dhe Irak.
Zoti Smirnov, po ashtu, ka theksuar se 3 mijë banorë të vendeve të Azisë Qendrore luftojnë së bashku me IS-in.