Ministri i Brendshëm i Shqipërisë, Saimir Tahiri, ka thënë se "Policia e Shtetit dhe të gjitha institucionet ligjzbatuese janë totalisht të angazhuara për të garantuar që ndeshja e nesërme të jetë një festë qytetarie, e denjë për Shqipërinë".
Nesër në Elbasan do të zhvillohet ndeshja kthyese e Grupit I të kualifikimeve për Kampionatin Evropian të Futbollit ndërmjet Shqipërisë dhe Serbisë.
Ky takim po zgjon interesim të madh, meqë fitorja eventuale i shton gjasat e kombëtares shqiptare për kualifikim.
"Policia Kufitare ka marrë masa në çdo pikë kufitare për monitorimin e kalimit të të gjithë shtetasve, veçanërisht të atyre që kanë për qëllim udhëtimi ndjekjen e ndeshjes nesër", ka thënë Tahiri përmes një deklarate për media.
"Forcat e rendit dhe Policisë Rrugore në të gjithë Shqipërinë janë tërësisht të angazhuara për garantimin e rendit dhe sigurisë publike në çdo ambient publik, si dhe monitorimin e të gjitha akseve rrugore në të gjithë vendin, por në mënyrë të veçantë në të gjitha akset që të çojnë në Elbasan dhe stadiumin 'Elbasan Arena'", ka theksuar Tahiri.