Zëdhënësi i Policisë së Kosovës, Baki Kelani, ka konfirmuar për Radion Evropa e Lirë se autoritetet e rendit, në orët e mbrëmjes së të hënës, kanë ndaluar deputetin e Lëvizjes Vetëvendosje, Albin Kurti.
Ndalimi i tij thuhet se ka të bëjë me hedhjen e gazit lotsjellës nga ana e zotit Kurti në sallën e Kuvendit të Kosovës, në shenjë kundërshtimi me marrëveshjen e arritur ndërmjet Kosovës dhe Serbisë për formimin e Asociacionit të komunave të banuara me shumicë serbe.
Kelani ka thënë se me urdhër të prokurorit kompetent, Kurti është dërguar në mbajtje dhe po intervistohet në stacionin e policisë në Prishtinë.
Ndërkohë, dhjetëra aktivistë të Vetëvendosjes janë mbledhur para të njëjtit stacion.
Nga pamjet që ka shpërndarë Lëvizja Vetëvendosje në Facebook, duket se aktivistët janë përleshur me policinë.