Presidenti rus Vladimir Putin ka thënë se Moska do të vazhdojë të mbështesë mediat në gjuhën ruse, jashtë vendit që japin informacione "objektive dhe të ndershme" për Rusinë dhe "arritjet e saj."
Putin tha se informacionet e tilla i ndihmojnë Rusisë që të "forcojë imazhin ndërkombëtar dhe të ushtrojë ndikimin e saj".
Sipas tij, këto informacione do i "thyejnë stereotipet e vjetra dhe paragjykimet" përballë "të gjitha llojeve të propagandës dhe klisheve kundër Rusisë."
Ai i bëri komentet gjatë një fjalimi në Kongresin Botëror të bashkë-atdhetarëve rusë, që jetojnë jashtë vendit.
Moska do të vazhdojë të mbështesë universitetet ruse për të "forcuar" degët e tyre jashtë vendit “sidomos në Bashkësinë e Shteteve të Pavarura," tha Putin.
Ai u zotua gjithashtu për të ofruar "kushte të favorshme" për të rinjtë rusë që jetojnë jashtë vendit, për të studiuar në universitetet në Rusi.
Organizatorët e forumit kanë thënë se rreth 400 përfaqësues të diasporës ruse po ndjekin mbledhjen dy-ditore në Moskë.
Sipas faqes së internetit të presidencës ruse, gati 30 milionë rusë jetojnë në 97 vende, duke u bërë kështu ndër katër diasporat më të mëdha në botë.
