Komisioneri i Bashkimit Evropian për Politikë Evropiane të Fqinjësisë dhe Negociata për Zgjerim, Johannes Hahn, viziton nesër Kosovën, njofton zyra e BE-së, në Prishtinë.
“Komisioneri Hahn do të takohet me Presidenten Atifete Jahjaga, Kryeministrin Isa Mustafa, Kryetarin e Kuvendit Kadri Veseli dhe zyrtarët e tjerë përkatës për të diskutuar implementimin e Marrëveshjes së Stabilizim Asociimit në mes të Kosovës dhe BE-së,” thuhet në njoftim.
Komisioneri Johannes Hahn, pritet t’u drejtohet nesër deputetëve të Kosovës.
Kjo do të jetë seanca e tretë me radhë, të cilën partitë opozitare, Vetëvendosje, Aleanca për Ardhmërinë e Kosovës dhe Nisma për Kosovën, kanë thënë se nuk do ta pengojnë.
Opozita kishte lejuar që të mbahej seanca solemne me rastin e vizitës së presidentit të Austrisë në Kosovë, si dhe seancën për ratifikimin e Marrëveshjes së Stabilizim Asociimit.
Ndërkohë tri parti në opozitë, kanë ritheksuar se do të vazhdojnë të bllokojnë punën e Kuvendit të Kosovës, përderisa, siç po pretendojnë ato, kryeministri i Kosovës, Isa Mustafa, të mos i tërheqë nënshkrimet nga Marrëveshja me Serbinë për Asociacionin e Komunave Serbe dhe ajo me Malin e Zi për demarkacionin e kufirit.